As 'k in mien olle durp kom, bin 'k weer 't lutje jong
Dij in moaren bootje vuir en over sloten sprong
Din goan mien gedachten, trug noar vrouger tied
'k Zai en roek de baauwte, 'k roak dat noeit weer kwiet
As ik mien ogen sloet, zai ik mien vrunden weer
De oaventuren dij wie haren, mit pieleboog en speer
Der gaait veur mie gain dag veurbie
Dak doar nait even aan denk

De loan bie 't olderliek hoeske, doar noar meulen tou
Der is gain boom van over, wat koal liekt mie dat nou
De zwoare linnebomen, woar 'k vrouger onner zat
Ik kin ze nait meer vinnen, der lopt nou 'n stainen pad
Op stee woar ais mien schoule ston, gruit kloaver en gras
Krep en stiekeldoorn gruien, woar ais 't schoulplaain was
Der gaait veur mie gain dag veurbie
Dak doar nait even aan denk

'k Heur weer moekes verskes, zang zo zuver zongen
'k Vuil pabbes haand op scholder,
As wie soamen vissen gongen
Din begunt dat weer te leven, 'k zai ales wonderkloar
't Vertraauwd gezicht van moeke,
Haand even deur mien hoar
Bie dij momenten van vrouger,
Vlogt 't bloud mie noar 't gezicht
Omdak 't nait verlaaizen wil,
Kniep ik mien haanden stief dicht
Der gaait veur mie gain dag veurbie
Dak doar nait even aan denk