Schrik mor nait, schrik mor nait, ik bin t mor
Kiek eem in dien dreume rond
Dreumen liggen op n bulde op de grond
Schrik mor nait, schrik mor nait

Zug dailen van wat komt, gedoantes uut t verleden
Kettens in n laange widde gaange en n trabbe noar beneden
k Zug n zundoagse koamer mit n örgel in de houk
Tuurlek is der kovvie, tuurlek is der kouk
Bie mie kleurt n dreume nooit de kleuren woar ik om vroag
t Is best beetje ainzoam, t is best een beetje voag

k Zug viskerluu op n kotter dij de Waddenzee bevoaren
Hondsbloumen op Ter Wuppen, voutstappen in t noorden
k Zug leutje kinder speulen, mor aine zit in n hörn
Ik heb dizze voaker zain, was t guster of ist mörn
De nacht is sums wat kold en t is n duuster hok
t Binnen laange uren en doagen, dij ik in berre moak

k Zug mementen dij k voak vergeet of aander joar herken
t Komt vanzulf en gait weer vot, te vroagen het ja gain zin
k Zug mien voader aalgedureg, wie proaten din eem wat bie
Kettens in n laange widde gaang dij örgel is van mie
Ik heur meziek, ik heur akkoorden t staarft n dreuge dood
De akoestiek van n lege dreum is iezeg kold mor groot