't Jong kwam van schole, de tas op de rugge
Gong boodschappen halen, zo rap at hee kon
Een kilo eerpels en twee karbonaadjes
Een kleddeken zoerkool, fris uut de ton

Zien moo had den naomeddag heelmaol verklungeld
En hee hef allene 't kokken edaon
Onder den afwas dei hee manges zingen
't Oge gevuld met een traon

Mama gaot no neet naor de bingo
Blief toch vanaovend bi-j mien
Mama gaot no neet naor de bingo
Ik heb ow vandage nog nauwleks ezeen
Mama, neet naor de bingo
Want dan blief ik hier zo alleen
Ik wil in ow arme mien lichaam verwarmen
Mien lief veult zo kold as een steen

't Laeven gong wieter, op stevege bene
Gong hee deur de welt, droog hoge de kop
Hee von ok een deerntjen, zee kregen twee kinder
Een hond en een auto, 't geluk kon neet op

Maor 't noodlot tröf altied onschuldege mensen
Zien vrouwken gong 's meddags en 's aovends op pad
Wol vertikaal, horizontaal, heel de kaarte
En hee met de kinder, zee zongen vol smart

Now zit hee in 't rösthuus en tweemaol per wekke
Komt vrouwleu dee geerne wat good wollen doon
Hee löt eur begaon, höldt zich van den dommen
Dut al wat zee wilt, völt neet uut den toon

Maor ens in de maond dan doot zee an bingo
Dan is der bi-j 'm gin hollen meer an
Hee hef alles in de riege en hee wunt alle prieze
En daornao dan zunk hee zo hard at hee kan