Op 't rad, daor wödt trad evat
Deur de bos en deur de heide
Heel alleen of met zien beide
Daor komt zee an

Op 't rad, daor wödt trad evat
Deur 't dal en langs de töppe
Vake zat in grote tröppe
Geet 't verdan

Op 't rad, daor wödt trad evat
In riegen gaot de fietsers deur de welt
Strakke leggingboksen
Zee'j aover 't zadel zwoksen
Nemes wiet zon volk nog tegenhölt

Tante Cato
knaejt nog astertoo
Hef ne fietse veur de cross
traent daormet in 't Idinkbos
De bötte komt der good van los
Zee stönt jo as ne koo

Gert van Tibbenbeer
wil der achterheer
smit zien fiets in 'n veerden gang
stoekt beschreen op de stang
barst dan los in jodelzang
Wat geet den kaerl tekeer

Aoverkempings Piet
Wil zien boekspek kwiet
De raeder raakt nog net de grond
't Schoem dat steet 'm veur de mond
't Zweit dat vlög in dröppe rond
I-j gleuft jo neet wa'j zeet

Met de boek op 't stuur
Stuf hee deur de natuur
Dreumt van 'n zommer an 't strand
't Vel zo strak an alle kant
Mooie vrouwleu an de hand
En 'n goddelek figuur