Ik heb de aolde Hunze kend
Ik heb het veen nog zien
Maor warken as mien opa mus
Det gun ik echt gienien
Bij zunopkomst de zend' op d'nak
Um 't natte gros te meien
En as de zun dan ondergunk
Stun hij nog stront te streien
't Zaod ien 't zeivat veur de borst
En toerloos rondties lopen
Gien trekker um 't wark te doen
Gien geld um wat te kopen

Ik kende nog de schone locht
Ik zag 't korhoen vliegen
Van 't sloven wat een meid toen mus
Kuj nou gien heugte kriegen
Mit heideborsels en mit zaand
Stun zij de bussen te borseln
't Heuilaand ien, de zwienen voeren
't Was alle dagen vrosseln
De was die dee ze met de haand
Het lichaam vrog verknooid
En kroepend deur het eerpellaand
Wordde heur jeugd vergooid

Ik heb nog echt de stilte kend
Ik drunk nog oet een slootie
Maor dat dat zo romantisch was
Dat is beslist een prootie
Een kiend van dartien, veertien jaor
Much al gien kiend meer blieven
Het mus er oet veur dag en nacht
Bij vromde meensen dienen
Het weur gewoonweg oetbesteed
Het mus wat metverdienen
Te weinig, want de bakker mus
Vaak op de latte schrieven

Ik heb nog echt de stilte kend
Ik heb het veen nog zien...