Nu alrest lebe ich mir werde
Sit min sündic ouge siht
Daz reine lanl und ouch die erde
Den man so vii eren giht
Mirst geschehen des ich ie bat
Ich bin komen an die statt
Da got mennischlichen trat

Schoeniu lant rich unde here
Swaz ich der noch han gesehen
So bist duz ir aller ere
Waz ist wunders hie geschehen!
Daz ein magt ein kint gebar
Here ubr aller engel schar
Was daz niht ein wunder gar?

Hie liez er sich reine toufen
Daz der mensche reine si
Do liezer sich herre verkoufen
Daz wir eigen wurden fri
Anders waeren wir verlorn
Wol dir, sper, kriuz unde dorn!
We dir, heiden, deist dir zorn!

Do er den tlevel do geschande
Daz nie kaiser bal gestreit
Do fuor er her wider ze lande
Do huop sich der juden leit
Daz er herre ir huote brach
Und daz man in sit lebendic sach
Den ir hant sluoc unde stach

Kristen, juden unde heiden
Jehent daz diz ir erbe si
Got sol uns ze reht bescheiden
Durch die sine namen dri
Al diu welt diu stritet her
Wir sin an der rehten ger
Rehl ist daz er uns gewer