Sometiem mi tink mi coe-workah crazy
di way Kristeen woodah gwaan jokey-jokey
den a nex time now a no-nonsense stance
di way she wine-dung di place lass krismus
dance
di way she love fi taak bout conspirahcy

mi an Kristeen inna di canteen a taak
bout di det a black people inna custidy
ow nat a cat mek meow ar a dyam daag
baak
ow nohbady high-up inna society
can awfah explaneashan nar remidy

wen Kristeen nit-up her brow
like seh a rhow shi agoh rhow
screw-up her face
like seh a trace shi agoh trace
hear her now:

yu tink a jus hem-high-five an James Ban
an poleece an solja ovah nawt highalan
wan
wen it come to black people Winston
some poleece inna inglan got liesense fi kill
well notn Kristeen seh suprize mi still
but hear mi now:

whey yu mean Kristeen
a who tell yu dat
a mussi waan eediat
yu cyaan prove dat

a who tell mi fi goh seh dat

Kristeen kiss her teet
an shi cut mi wid her yeye
an shi seh yu waan proof

yu cyaan awsk Clinton McCurbin
bout im haxfixiashan
an yu cyaan awsk Joy Gardner
bout her sufficaeshan
yu cyaan awsk Colin Roach
if im really shoot imself
an yu cyaan awsk Vincent Graham
if a im stab imself
Imt yu can awsk di Commnshnah
bout di liesense fi kill
awsk Sir Paul Condon
bout di liesense fi kill

yu cyaan awsk di Douglas dem
bout di new style batan
an you cyaan awsk Tunay Hassan
bout im det by niglect
yu cyaan awsk Marlon Downes
if im hav any regret
an yu cyaan awsk EI Gammal
bout di mistri a im det
but yu can awsk Dame Barbara
bout di liesense fi kill
awsk di DPP
bout di liesense fi kill

yu cyaan awsk Ibrahima
bout di CS gas attack
an yu cyaan awsk Missis Jarrett
ow shi get her hawt-attack
yu cyaan awsk Oliver Price
bout di grip roun im nek
an yu cyaan awsk Steve Boyce
bout im det by niglect
but yu can awsk di PCA
bout di liesense fi kill
awsk di ACPO
bout di liesense fi kill

yu fi awsk Maggi Tatcha
bout di liesense fi kill
yu can awsk Jan Mayja
bout di liesense fi kill
yu fi awsk Mykel Cowad
bout di liesense fi kill
an yu can awsk Jak Straw
bout di rule af law
yu fi awsk Tony Blare
if im is aware ar if im care
bout di liesense fi kill
dat plenty poleece feel dem gat

Sometiem mi tink mi coe-workah crazy
di way Kristeen woodah gwaan jokey-jokey
den a nex time now a no-nonsense stance
di way she wine-dung di place lass krismus
dance
di way she love fi taak bout conspirahcy